नकार

दूरवर पसरलेल्या हिरवळीमध्ये
रिमझिम बरसनार्‍या पावसाचा आनंद कसा घ्यायचा याची कधी ट्युशन लावावी लागते का ?

चंद्राचे शीतल चांदणे पांघरून शांतपणे झोपताना
"आयुष्य सुंदर आहे " हे वेगळं सांगायची गरज असते का ?

एन तरुणाईत गुलाबी थंडीतल्या गुलाबी गप्पा
तासन्तास मारण्यासाठी विषयांची कमतरता कधी भासते का ?

आपलं नातं ही अगदी तसंच आहे
तुझ्या खिडकीतून हसणारा नि माझ्या अंगणातून डोकावणारा
तो चंद्र एकच आहे
आपण एकमेकाना भेटलो नाही म्हणून काय झालं ?
आपल्याला भिजवणारा पाऊस एक आहे
आणि तो मृदगंध ही
मला सुखावणारी प्रत्येक झुळूक सुद्धा आधी तुलाच भेटून येते
याची ही मला खात्री आहे

सूर्याला पृथ्वी वरचं आपलं प्रेम सिद्ध करण्यासाठी
पृथ्वीवर यायची कधी गरज असते का ?

प्रिये , या सर्व प्रश्नांचे उत्तर "नाही" असेच आहे
म्हणूनच तर तुझ्या "नाही" चे मला कधीच वाईट वाटले नाही .

                                                                      --भालचंद्र